|
Bømlo Kammerorkester, tidlegare Bømlo Strykeorkester, vart starta vinteren 1998. Orkesteret er først og fremst eit resultat av at Bømlo Musikk- og kulturskule i 1997 tilsette Margarita Popova og Dimtcho Ginev i sin lærarstab. Ekteparet, som kjem frå Bulgaria, har lang røynsle med orkesterarbeid, og er dei som skal ha brorparten av æra for at orkesteret er kva det er i dag. Ved utgongen av november 2004 hadde orkesteret 25 aktive medlemmer. 7 av desse var såkalla juniorar, eller nybyrjarar, medan 2 var vaksne. Alderen på ungdoms-medlemene er frå 7 til 17 år. Orkesteret har øvingslokale i Musikk-skulesenteret ved Ungdomsskulen i kommunesenteret Svortland i Bømlo. Medlemene kjem frå heile kommunen, frå Langevåg i sør til Rolfsnes i nord. Nokre kjem jamvel frå nabokommunen Stord. Orkesterøvingane finn stad kvar onsdag, frå 1700 – 1800 for Juniororkesteret og 1800 – 1940 for Ungdomsorkesteret. Orkesteret held fleire konsertar i løpet av året. Dette er både konserter som orkesteret arrangerer sjølve, vert inviterte til, eller som Bømlo Musikk- og kulturskule held. Orkestermedlemmer deltek òg med solist-framføringar. Om lag ein gong i året arrangerer orkesteret seminar for strykarar i Sunn-hordland. Seminaret vert avslutta med konsert. Dette har så langt vore svært vellykka. Kammerorkesteret har òg vore utanlands, på besøk hjå venskapskommunen Faster i Danmark. Dette var eit arrangement i regi av Foreningen Norden.. Kvart år arrangerer Bømlo Musikk- og kulturskule adventskonsert. Då får utøvarane i musikk og kulturskulen høve til å spela saman med ein kjend artist/utøvar. Sondre Bratland og Reidun Horvei er utøvarar som det samansette orkesteret har halde konsert saman med. I år var det artisten Ståle Ytterlid som var den heldige. Det vart ein svært vellukka konsert. I tillegg til dette har orkesteret delteke på avslutningskonsertar i tilknyting til Kystgildet/Kystsogevekene. I 2003 var ein i Grieghallen, og i år var det i Maritim Hall i Haugesund ein fekk høve til å opptre. Bømlo Kammerorkesteret held eit svært høgt nivå til å vere eit orkester med barn og unge som driv med dette på fritida si. Margarita Popova er ein framifrå fiolininstruktør og har individuelle øvingar med elevane i tillegg til orkesterøving ein gong i veka. Saman med Dimtcho Ginev, pianist, dirigent og arrangør, styrer dei orkesteret med stø og profesjonell hand. Medlemer og føresette er no spente på kva den nære framtida vil bringe. Orkesteret er nemleg invitert til Moskva i samband med 100 års-jubileet for Noreg si lausriving frå Sverige, og ein arbeider i desse dagar med å få dette til. Det er mykje som må klaffa, både musikalsk, økonomisk og reint praktisk om det skal verte noko av. Spanande vert det, og ei stor oppleving for alle om me klarar å få det til.
|